ලොවක් ආදරය කළ ගායිකා ඩොලි පාර්ටන් දිවියෙන් සමුගනී

කන්ට්‍රි සංගීත ලෝකයේ දැවැන්තම ගායන ශිල්පිනියක සහ ගීත රචකයකු ලෙස ලොව පුරා ජනප්‍රිය වූ ඩොලි පාර්ටන් වයස අවුරුදු 80ක්ව සිටියදී අභාවප්‍රාප්ත වී තිබේ.

ඇයගේ මරණය සම්බන්ධයෙන් පවුලේ සාමාජිකයන් විසින් තහවුරු කර ඇති අතර, ඇයගේ වියෝව සංගීත ලෝකයට දැඩි පාඩුවක් ලෙස සැලකේ.

දශක හයකට ආසන්න කාලයක් පුරා සංගීත ක්ෂේත්‍රයේ සුවිශේෂී සලකුණක් තැබූ ඩොලි පාර්ටන්, “Jolene” සහ “I Will Always Love You” ඇතුළු ලොව පුරා ජනප්‍රිය වූ ගීත රැසක් නිර්මාණය කළාය. ඇය ගීත රචනය, ගායනය මෙන්ම රංගනය තුළින්ද විශාල ජනප්‍රියත්වයක් හිමිකර ගත්තාය.

දුප්පත් පවුලක ටෙනසි ප්‍රාන්තයේ කුඩා නිවසක උපත ලැබූ ඇය, කුඩා වියේ සිටම සංගීතයට සම්බන්ධ වූ අතර පසුව නෑෂ්විල් නගරය වෙත පැමිණ වෘත්තීය සංගීත ජීවිතය ආරම්භ කළාය. ඇයගේ සංගීත දිවිය පසුව ඇමෙරිකානු කන්ට්‍රි සංගීතයේ සීමාවන් ඉක්මවා ජාත්‍යන්තර ජනප්‍රියත්වයක් දක්වා වර්ධනය විය.

ඩොලි පාර්ටන් ගීත රචකයකු ලෙසද දැවැන්ත සාර්ථකත්වයක් ලබාගත් අතර, ඇය ගීත 3,000කට ආසන්න සංඛ්‍යාවක් රචනා කර ඇති බව වාර්තා වේ. ලොව පුරා වාර්තාගත ගීත අලෙවියක්ද හිමිකරගත් ඇය Grammy සම්මාන ඇතුළු සම්මාන රැසකින් පිදුම් ලැබුවාය.

සංගීතයට අමතරව සිනමාව සහ රූපවාහිනිය තුළද ඇය කැපී පෙනෙන චරිත නිරූපණය කළ අතර, 9 to 5 සහ Steel Magnolias වැනි නිර්මාණ හරහා රංගන ශිල්පිනියක ලෙසද විශාල ප්‍රේක්ෂක ආදරයක් දිනා ගත්තාය.

එමෙන්ම දරුවන්ගේ සාක්ෂරතාව ඉහළ නැංවීම සඳහා ක්‍රියාත්මක කළ Imagination Library වැඩසටහන හරහා මිලියන ගණනක් දරුවන් වෙත පොත් ලබාදීමට ඇය කටයුතු කළාය. ඇයගේ පුණ්‍ය කටයුතු හේතුවෙන්ද ඩොලි පාර්ටන් ලොව පුරා මහත් ගෞරවයට පාත්‍ර වූවාය.