By දේශීය සිනමා කර්මාන්තය නඟාසිටුවීම හා ප්රේක්ෂකයන් වර්ධනය කරගැනීම උදෙසා රට පුරා නව ප්රාදේශීය සිනමා ශාලා ඉදිකිරීමේ දැවැන්ත වැඩපිළිවෙළක් ජාතික චිත්රපට සංස්ථාව මඟින් ක්රියාත්මක කිරීමට සැලසුම් කරයි.
වත්මන් රජයේ “පොහොසත් රටක් – ලස්සන ජීවිතයක්” ජාතික ප්රතිපත්තියට සමගාමීව මේ වැඩසටහන ආරම්භ කෙරේ.
දේශීය සිනමා කර්මාන්තය නව මඟකට යොමුකරමින් සහ ප්රේක්ෂකයන්ට උසස් සිනමා අත්දැකීමක් සමීප කරවීමේ ද අරමුණ ඇතිව මෙය ක්රියාත්මක කිරීමට නියමිතය.
පෞද්ගලික අංශයේ ව්යාපාරික ප්රජාවගේ දායකත්වයෙන් ක්රියාත්මක කෙරෙන මෙම සිනමා ව්යාපෘතිය පිළිබඳ මූලික සාකච්ඡාව ජාතික චිත්රපට සංස්ථාවේ සභාපති සුදත් මහදිවුල්වැව මහතාගේ ප්රධානත්වයෙන් පසුගියදා එම සංස්ථා පරිශ්රයේදී පැවැත්විණ.
මෙම ව්යාපෘතිය යටතේ ඉදිකිරීමට නියමිත සියලුම සිනමා ශාලා අතිනවීන ඩිජිටල් තාක්ෂණයෙන් (High-Tech) සමන්විත වන අතර, ප්රේක්ෂකයන්ට උපරිම සුවපහසුව සැලසෙන පරිදි ආසන 50ත් 100ත් අතර ධාරිතාවකින් යුක්තව නිර්මාණය කිරීමට සැලසුම් කර තිබේ.
නව සිනමා ශාලා ඉදිකිරීම සහ පවතින සිනමා ශාලා නවීකරණය කිරීම සඳහා ව්යාපාරික කණ්ඩායම් කිහිපයක්ම මේ වන විටත් චිත්රපට සංස්ථාව සමඟ එකඟතාවලට පැමිණ ඇත.
ඒ අනුව, නව සිනමා ශාලා ඉදිකරන ප්රදේශ වන්නේ ගෝනවිල, පන්නල, පිටකෝට්ටේ, නාරම්මල සහ නිට්ටඹුවය.
සිනමා ශාලා නවීකරණය කෙරෙන ප්රදේශ වන්නේ හැටන්, මොනරාගල, ඇඹිලිපිටිය සහ නුගේගොඩ ප්රදේශවලය. මෙහිදී පවතින සිනමා ශාලා නව තාක්ෂණය යොදාගනිමින් සම්පූර්ණයෙන්ම උත්ශ්රේණිගත කිරීමට නියමිතය.
මීට අමතරව තවත් ප්රාදේශීය නගර රැසක නව සිනමා ශාලා ඉදිකිරීම සඳහා ඉදිරියේදී ආයෝජකයන් සම්බන්ධ කර ගැනීමට සූදානමින් සිටී.
