ඉන්දීය විවාහ උත්සව ශ්‍රී ලංකාවට ආකර්ෂණය කර ගැනීමට විශේෂ ප්‍රවර්ධන වැඩසටහනක්

ඉන්දියානු විවාහ මංගල උත්සව (Destination Weddings) සඳහා ශ්‍රී ලංකාව කෙරෙහි වැඩි අවධානයක් යොමු කරවා ගැනීමේ අරමුණින්, බටහිර ඉන්දියාවේ සූරත් සහ පූනේ නගරවලදී සැප්තැම්බර් 28 සහ 30 යන දිනවල විශේෂ ප්‍රවර්ධන වැඩසටහන් මාලාවක් පැවැත්විණ.

ශ්‍රී ලංකා සංචාරක ප්‍රවර්ධන කාර්යාංශය (SLTPB) සහ මුම්බායි හි ශ්‍රී ලංකා කොන්සල් ජනරාල් කාර්යාලය ඒකාබද්ධව මෙම “ගමනාන්ත විවාහ මංගල ප්‍රවර්ධන වැඩසටහන – 2026” සංවිධාන කර තිබිණ.

මුම්බායි හි ශ්‍රී ලංකා කොන්සල් ජනරාල් කාර්යාලය විසින් නිකුත් කරන ලද මාධ්‍ය නිවේදනයකට අනුව, ඉන්දියාවේ ප්‍රමුඛ පෙළේ විවාහ උත්සව ගමනාන්තයක් ලෙස ශ්‍රී ලංකාව ප්‍රචලිත කිරීම අරමුණු කරගනිමින් මාධ්‍ය සාකච්ඡා සහ හමුවීම් මෙම වැඩසටහනට ඇතුළත් විය.

මෙම අවස්ථාවන් සඳහා විවාහ මංගල සැලසුම්කරුවන්, සංචාරක කර්මාන්තයේ වෘත්තිකයන් සහ මාධ්‍ය නියෝජිතයන් සහභාගී වූ අතර, එහිදී ශ්‍රී ලංකාවේ සුඛෝපභෝගී හෝටල්, සංස්කෘතික අත්දැකීම්, මනරම් ස්ථාන සහ විශේෂිත විවාහ සේවාවන් පිළිබඳව පුළුල් ලෙස සාකච්ඡා කෙරිණ.

රැස්වීම් අමතමින් මුම්බායි හි ශ්‍රී ලංකා කොන්සල් ජනරාල් ප්‍රියංගා වික්‍රමසිංහ මහත්මිය සඳහන් කළේ, ශ්‍රී ලංකාවේ පුළුල් වන සංචාරක යටිතල පහසුකම් සහ ආගන්තුක සත්කාර සේවා මත පදනම්ව, ඉහළ පෙළේ ඉන්දියානු මංගල උත්සව සඳහා මෙරට වඩාත් ගැළපෙන පසුබිමක් සපයන බවයි.

විශේෂයෙන්ම 2026 ජුනි මාසයේදී අහමදාබාද් සහ කොළඹ අතර ‘ෆිට්ස්එයාර්’ (FitsAir) සෘජු ගුවන් ගමන් ආරම්භ වීම ඇතුළුව, බටහිර ඉන්දියාව සහ ශ්‍රී ලංකාව අතර ගුවන් සබඳතාවල දියුණුවක් සිදුවී ඇති බව ඇය පෙන්වා දුන්නාය. පහසු ගමන් පහසුකම්, සාම්ප්‍රදායික විවාහ චාරිත්‍ර සඳහා පහසුකම්, අභිරුචිකරණය කළ ආහාර සැපයුම්, ආගමික හා අධ්‍යාත්මික චාරිකා මෙන්ම වාසිදායක විනිමය අනුපාත හේතුවෙන් විදේශයන්හි මංගල උත්සව සැලසුම් කරන ඉන්දියානු පවුල් සඳහා ශ්‍රී ලංකාව ආකර්ෂණීය තේරීමක් බව ඇය වැඩිදුරටත් පැවසුවාය.

දියමන්ති, මැණික් සහ රෙදිපිළි කර්මාන්තවල ප්‍රධාන මධ්‍යස්ථානයක් වන සූරත් නගරය සහ මහාරාෂ්ට්‍ර ප්‍රාන්තයේ වැදගත් සංස්කෘතික හා වාණිජ නගරයක් වන පූනේ යන නගර ඉලක්ක කරගනිමින් මෙම වැඩසටහන ක්‍රියාත්මක කරන ලදී. ඉන්දියානු මංගල සැලසුම්කරුවන්, සංචාරක වෘත්තිකයන් සහ සංචාරක කර්මාන්තයේ අනෙකුත් නියෝජිතයන් සමඟ ශක්තිමත් හවුල්කාරිත්වයන් ගොඩනගා ගැනීම මෙම නගර තෝරාගැනීමේ මූලික අරමුණ විය.

ඉන්දියාවට ආසන්න පිහිටීම, සුඛෝපභෝගී නවාතැන් පහසුකම්, සංස්කෘතික අත්දැකීම්, මනරම් ස්වභාව සෞන්දර්යය සහ ආගන්තුක සත්කාරය පුළුල් ලෙස ප්‍රචාරය කරමින් තවත් වැඩි ඉන්දියානු මංගල උත්සව ප්‍රමාණයක් මෙරටට ආකර්ෂණය කර ගැනීමට ශ්‍රී ලංකා සංචාරක අංශය බලාපොරොත්තු වේ.