By ඇමරිකාවේ රැකවරණය සඳහා අයදුම් කර ඇති හෝ රැකවරණය ඉල්ලා සිටින විදේශිකයන් දෙලක්ෂයකගේ ව්‍යාපාරික සහ සංචාරක වීසා අවලංගු කිරීමට ට්‍රම්ප් පරිපාලනය සූදානම් වන බව ඊයේ(24) පළ වූ ඇමරිකානු මාධ්‍ය වාර්තාවලින් අනාවරණය විය. මෙම සැලසුම ක්‍රියාත්මක කළහොත්, එය ඇමරිකානු ඉතිහාසයේ එක් අවස්ථාවක සිදුකරන විශාලතම වීසා අවලංගු කිරීමේ මෙහෙයුම වනු ඇත.
ඇමරිකානු රාජ්‍ය දෙපාර්තමේන්තුව සහ ඇමරිකානු නිලධාරීන් දෙදෙනෙකු උපුටා දක්වමින්, The Associated Press වාර්තා කළේ නීතිමය අභියෝගවලට මුහුණ නොදුන්නහොත්, 2016 සිට 2026 දක්වා කාලය තුළ නිකුත් කළ ඇතැම් B1 සහ B2 වීසා, ඒවායේ හිමිකරුවන් රැකවරණය සඳහා අයදුම් කර ඇති හෝ අයදුම් කරමින් සිටින අවස්ථාවලදී, ඉදිරි සති කිහිපය තුළ අවලංගු කරන බව නිවේදනය කිරීමට අපේක්ෂා කරන බවය. මෙම පියවර ස්වදේශ ආරක්ෂක දෙපාර්තමේන්තුව සමඟ සම්බන්ධීකරණයෙන් මෙය ක්‍රියාත්මක කෙරෙනු ඇත.
ඇමරිකානු රාජ්‍ය දෙපාර්තමේන්තුවේ ප්‍රකාශක Tommy Piggott පැවසුවේ, කෙටි කාලයක් සඳහා ඇමරිකාවට පැමිණෙන බව පවසමින් පසුව ස්ථිර පදිංචිය සඳහා රැකවරණය ඉල්ලා සිටින විදේශිකයන්ගේ සංක්‍රමණික නොවන වීසා හඳුනාගෙන අවලංගු කිරීම සඳහා ස්වදේශ ආරක්ෂක දෙපාර්තමේන්තුව සමග සම්බන්ධීකරණයෙන් කටයුතු කරමින් සිටින බවය.
වාර්තාව සඳහන් කළේ අවලංගු කළ හැකි වීසා සංඛ්‍යාව සම්බන්ධයෙන් අදහස් දැක්වීම ඔහු ප්‍රතික්ෂේප කළ බවය. මෙම ක්‍රියාවලිය අඛණ්ඩව සිදුවන බැවින් අවලංගු කරන වීසා සංඛ්‍යාව නිරන්තරයෙන් වෙනස් වන බව හෙතෙම සඳහන් කර ඇත.
වීසා අවලංගු කිරීමෙන් අදාළ පුද්ගලයන් වහාම පිටුවහල් කිරීම අනිවාර්යයෙන්ම සිදු නොවන බව අදාළ වාර්තාවේ, නිර්නාමික නිලධාරීන් උපුටා දක්වමින් සඳහන් කර තිබිණ.
2025 ජනවාරි මාසයේ ට්‍රම්ප් නැවත ධවල මන්දිරය වෙත පැමිණීමෙන් පසු, ඔහු ආගමන ප්‍රතිපත්ති තවදුරටත් දැඩි කරමින්, නීති විරෝධී සංක්‍රමණිකයන් පිටුවහල් කිරීම ශක්තිමත් කර ඇති අතර, ඇමරිකානු වීසා හිමිකරුවන් පිළිබඳ පරීක්ෂාව ද වැඩි කර තිබේ.
පසුගිය වසරේ අගෝස්තු මාසයේදී එරට මාධ්‍ය වාර්තා කළේ, ට්‍රම්ප් පරිපාලනය ඇමරිකානු වීසා හිමි පුද්ගලයන් මිලියන 55කට ආසන්න පිරිසක් සමාලෝචනය කරමින් සිටින බවය. කිසියම් නීති කඩකිරීමක් වාර්තා වුවහොත් ඔවුන්ගේ වීසා අවලංගු කිරීමට හෝ ඔවුන් පිටුවහල් කිරීමට හැකි බවත් මාධ්‍ය වාර්තා කර තිබිණ.
අගෝස්තු 10වන දා, ඇමරිකානු රාජ්‍ය දෙපාර්තමේන්තුව ප්‍රකාශයක් නිකුත් කරමින් සඳහන් කළේ, ට්‍රම්ප් සිය දෙවන ජනාධිපති ධුර කාලය ආරම්භ කළ දා සිට එරට රජය විසින් සංක්‍රමණික නොවන වීසා 175,000කට වැඩි ප්‍රමාණයක් අවලංගු කර ඇති බවය.
