By ප්රංශ ජාතික කාන්තාවක් සහ දරුවන් පස්දෙනකු ඇගේ පාකිස්තාන ජාතික සැමියා විසින් වසර 12ක කාලසීමාවක් පුරා ප්රාණ ඇපකරුවන් ලෙස රඳවා තබා ගැනීමේ පුවතක් පාකිස්තානයෙන් වාර්තා වේ. සිල්වි යැස්මිනා ලෙස හඳුනාගෙන ඇති 54 හැවිරිදි එම කාන්තාව සහ දරුවන් පාකිස්තානයේ කයිබර් පක්ටුන්ක්වා ප්රාන්තයේ බාරා නගරයේ පිහිටි නිවෙසක මෙලෙස රඳවා තබාගෙන ඇති අතර, පසුව ඇගේ පුත්රයකු නිවෙසින් පැනගොස් පොලීසියට කළ පැමිණිල්ලකට අනුව ඔවුන් මුදාගෙන ඇතැයි විදෙස් මාධ්ය වැඩිදුරටත් වාර්තා කරයි.
පැමිණිල්ලට අනුව ක්රියාත්මක වූ පොලීසිය විශේෂ මෙහෙයුමක් ක්රියාත්මක කරමින් එම නිවෙසේ අබලන් වූ කාමරයක් තුළ සිරකර සිටි පිරිස මුදාගෙන ඇති අතර, සිදුවීමට සම්බන්ධ පාකිස්තාන ජාතික සැමියා පොලීසිය විසින් අත්අඩංගුවට ගෙන තිබේ. කාන්තාව සහ දරුවන්ට වධ හිංසා සිදු කළ බවට පෙන්නුම් කරන තුවාල තිබූ බව පොලීසිය ප්රකාශ කර ඇති අතර, ඔවුන් පේෂාවර් නුවර පිහිටි ආරක්ෂිත මධ්යස්ථානයක් වෙත යොමු කර ඇතැයි වාර්තා වේ. මේ වන විට පොලීසියේ මැදිහත්වීමෙන් ඔවුන්ට අවශ්ය ආධාර සහ ආරක්ෂාව සපයා ඇති බවත්, ඔවුන් මේ වන විට නැවත ප්රංසය වෙත පිටත් කිරීම සඳහා අවශ්ය කටයුතු සූදානම් කරමින් සිටින බව විදෙස් මාධ්ය සඳහන් කරයි.
