By ජපාන ආරක්ෂක බළකායට ගොඩබිම සිට නෞකා වෙත ප්‍රහාර එල්ල කරන මිසයිල සහ ප්‍රහාරක ඩ්‍රෝන භාවිතය පුහුණු කිරීමේ හැකියාව අධ්‍යයනය කිරීමට ජපාන ආරක්ෂක අමාත්‍යාංශයේ නියෝජිත කණ්ඩායමක් ඉන්දියාවේ සංචාරයක නිරතව වී ඇතැයි විදෙස් මාධ්‍ය වාර්තා කරයි. ජපාන ආරක්ෂක බළකායේ මාණ්ඩලික ප්‍රධානී ජෙනරාල් අරායි මසයෝෂී සඳහන් කර ඇත්තේ සිය ආත්මාරක්ෂාව වර්ධනය කරගැනීමේ හැකියාවන් අධ්‍යයනය කිරීමට එම නියෝජිත පිරිස ඉන්දියාව බලා පිටත් වූ බවය. කිලෝමීටර් සිය ගණනාවක දුරකට ප්‍රහාර එල්ල කළ හැකි මිසයිල පරීක්ෂා කිරීමට සහ හමුදා නිලධාරීන්ට එම පුහුණුව ලබාදීමට ජපානය තුළ සුදුසු ප්‍රදේශ සීමිත බැවින් මේ පියවර ගත් බව ද ජෙනරාල් මසයෝෂි ප්‍රකාශ කර තිබේ.
ජපාන ආරක්ෂක අමාත්‍යාංශයේ නියෝජිත කණ්ඩායම ඉන්දියාවේ මිසයිල පරීක්ෂණ මධ්‍යස්ථාන නිරික්ෂණය කරමින් සහ මිසයිල එල්ල කළ හැකි දුර පරාසයන් පිළිබඳ අධ්‍යයනය කරමින් සතියක පමණ කාලසීමාවක් ඉන්දියාවේ රැඳී සිටි බව ද වාර්තා වේ.
