ඕනෑම ආකාරයක ඒකපාර්ශ්වික හිරිහැර කිරීමකට සහ සීතල යුද මානසිකත්වයට එරෙහි වීමට චීනය සූදානම්

සංවර්ධන උපාය මාර්ග පෙළගැස්වීමට සහ ඒකපාර්ශ්වික හිරිහැරයට එරෙහි වීමට චීනය ආසියාන් සංවිධානය සමග කටයුතු කරන බව චීන විදේශ අමාත්‍යංශය පවසයි.

චීන විදේශ අමාත්‍ය වං යී මහතා සහ බෲනායි හි දෙවන විදේශ කටයුතු අමාත්‍ය Dato Erywan Pehin Yusof මහතා අතර සාකච්ඡාවක් ඊයේ(11) බෙයිජිංහිදී පැවත්විණ. ඕනෑම ආකාරයක ඒකපාර්ශ්වික හිරිහැර කිරීමකට සහ සීතල යුද මානසිකත්වයට එරෙහි වීමට චීනය සූදානම් බව වං යී මහතා එහිදී පැවසීය.

ආසියාන් සංවිධානය චීනයේ සමීපතම සහයෝගිතා හවුල්කරුවා ලෙස සලකන අතර එම සංවිධානය සමග අන්‍යෝන්‍ය සහයෝගයෙන් සහ විශ්වාසයෙන් චීනය අඛණ්ඩව කටයුතු කරනු ඇත. සංවර්ධන උපාය මාර්ග පෙළගැස්වීමට, සහයෝගීතාවය ප්‍රවර්ධනයට, කලාපයේ විවෘත බව තහවුරු කිරීමට සහ සැබෑ බහුපාර්ශ්විකත්වය අනුගමනය කිරීමට ආසියාන් සංවිධානය සමග එක්ව කටයුතු කරන බව හෙතෙම සඳහන් කළේය.

ලබන වසරේදී චීන-බෲනායි අතර රාජ්‍ය තාන්ත්‍රික සබඳතා ස්ථාපිත කිරීමේ 35 වන සංවත්සරය සනිටුහන් වේ. රාජ්‍ය නායකයින් දෙදෙනා විසින් ඇති කරගත් වැදගත් එකඟතාවය මූලික මාර්ගෝපදේශයක් ලෙස ගනිමින් බෲනායි සමග ඉහළ මට්ටමේ හුවමාරු පවත්වා ගැනීමට අපේක්ෂා කරන බව වං යී මහතා පැවසීය.

තායිවානය මහජන චීන සමූහාණ්ඩුවේ අනිවාර්ය කොටසක් බව බෲනායි පිළිගන්නා අතර එකම චීනය ප්‍රතිපත්තියට කැපවී සිටින බවත් චීනයේ ජාතික නැවත එක්වීම සඳහා වන ශ්‍රේෂ්ඨ අරමුණට සහාය දක්වන බවත් Dato Erywan මහතා සඳහන් කළේය. බෲනායි-චීන සබඳතා වැඩි දියුණු කරමින් චීනය සමග සමීප ඉහළ මට්ටමේ හුවමාරු පවත්වා ගැනීමට, දේශපාලන අන්‍යෝන්‍ය විශ්වාසය ශක්තිමත් කිරීමට, මානව සහ සංස්කෘතික හුවමාරු ප්‍රවර්ධනය කිරීමට මෙන්ම විවිධ ක්ෂේත්‍රයන්හි සහයෝගීතාව පුළුල් කිරීමට බෲනායි කැමැත්තෙන් සිටී.

චීනය සහ ආසියාන් සහයෝගීතා හවුල්කරුවන් බව සඳහන් කළ ඔහු ආසියාන්-චීන සබඳතා රාමුව තුළ සමීප සහයෝගීතාවයක් පවත්වා ගනිමින් සියලුම රටවල ජනතාවට ප්‍රතිලාභ ගෙන ඒමට එක්ව ක්‍රියා කරන ලෙස ඉල්ලීමක් ‍කළේය.

2026 වසරේ APEC ආර්ථික නායකයින්ගේ රැස්වීම සාර්ථකව පැවැත්වීම සඳහා බෲනායි චීනයට පූර්ණ සහාය දක්වන අතර ජාත්‍යන්තර හා කලාපීය කටයුතුවලදී චීනය බලපෑම් සහගතව මෙන්ම මූලිකත්වය ගෙන ක්‍රියා කරනු ඇතැයි අපේක්ෂා කරන බව ඔහු වැඩිදුරටත් පැවසීය.